👁️ Loading views...

ഇരുൾ മൂടിയ ഇടനാഴികൾ കോളേജിലെ ക്ലാസ് മുറികളിൽ നിന്ന് വിദ്യാർത്ഥികളുടെ ബഹളങ്ങൾ ഒഴിഞ്ഞു തുടങ്ങിയിരുന്നു.

 സായാഹ്ന സൂര്യന്റെ മങ്ങിയ വെളിച്ചം കോളേജ് കാമ്പസിലെ പഴയ കെട്ടിടത്തിന്റെ ചുവരുകളിൽ പതിക്കുന്നു. 

കോളേജിലെ മലയാളം വിഭാഗം അധ്യാപിക ആര്യ തന്റെ ബാഗെടുത്ത് പുറത്തിറങ്ങി.

 സുന്ദരിയും, അല്പം ഗൗരവക്കാരിയുമായ ആര്യ, കോളേജിലെ വിദ്യാർത്ഥികൾക്ക് ഏറെ പ്രിയപ്പെട്ടവളായിരുന്നു. 

എന്നാൽ, ആ സ്നേഹം എല്ലാവർക്കും ഒരുപോലെയിരുന്നില്ല.

കോളേജിന്റെ ഗേറ്റിനടുത്ത് അരവിന്ദ് നിന്നു. പത്തു വർഷമായി ഈ കോളേജിലെ വാച്ച്മാനാണ് അയാള്.. കോളേജിനോടും അവിടുത്തെ ഓരോ മരത്തോടും ഒരു പ്രത്യേക മമതയുള്ള അരവിന്ദ്, അച്ചടക്കത്തിന്റെ കാര്യത്തിൽ അങ്ങേയറ്റം കർക്കശക്കാരനായിരുന്നു.

ആര്യ കോളേജിൽ ജോയിൻ ചെയ്തത് മുതലാണ് അരവിന്ദിന് അവളോട് ഒരുതരം വിരോധം തോന്നാൻ തുടങ്ങിയത്. 

ആര്യയുടെ പെരുമാറ്റരീതികൾ അരവിന്ദിന് ഒട്ടും പിടിച്ചിരുന്നില്ല. 

വിദ്യാർത്ഥികൾക്ക് സ്വാതന്ത്ര്യം നൽകുന്നതും, നിയമങ്ങൾ ലംഘിക്കാൻ അവരെ അനുവദിക്കുന്നതും അരവിന്ദിനെ സംബന്ധിച്ചിടത്തോളം അച്ചടക്കക്കേടാണ്.

 ഒരിക്കൽ, ക്ലാസ് സമയം കഴിഞ്ഞിട്ടും ലൈബ്രറിയിൽ ഇരിക്കാൻ അനുവദിക്കാത്തതിന് അരവിന്ദിനെ ആര്യ പരസ്യമായി ശാസിച്ചു.

 "വാച്ച്മാനായ നിങ്ങൾ ഗേറ്റ് തുറക്കാനും അടയ്ക്കാനും മാത്രം നിന്നാൽ മതി, പാഠ്യപദ്ധതിയിൽ ഇടപെടേണ്ട" എന്ന അവളുടെ വാക്കുകൾ അരവിന്ദിന്റെ മനസ്സിൽ വലിയൊരു മുറിവുണ്ടാക്കിയിരുന്നു.

അന്ന് വൈകുന്നേരം, മഴ ചാറാൻ തുടങ്ങിയ സമയം. ആര്യ തന്റെ കാർ പാർക്കിംഗിൽ നിന്ന് എടുക്കാൻ ചെന്നു. 

കുറച്ചു കഴിഞ്ഞ്, സെക്യൂരിറ്റി റൂമിന് സമീപം നിന്ന അരവിന്ദിന് ആര്യയുടെ കാറിൽ നിന്ന് ഒരു ഉച്ചത്തിലുള്ള ശബ്ദം കേട്ടു. 

അയാള് അങ്ങോട്ട് ഓടിച്ചെന്നു. 

കണ്ട കാഴ്ച അവനെ ഞെട്ടിച്ചു.

 ആര്യയുടെ കാർ മുറ്റത്തെ മരത്തിൽ ഇടിച്ചു നിൽക്കുന്നു. 

ആര്യ സ്റ്റിയറിംഗിൽ തല ചായ്ച്ചു കിടക്കുന്നു. അവളുടെ കഴുത്തിൽ ഒരു പാട് വീണിരുന്നു. അവൾ മരിച്ചിരുന്നു.

മണിക്കൂറുകൾക്കുള്ളിൽ പോലീസ് കോളേജിലെത്തി.

 ആര്യയുടെ മരണം കൊലപാതകമാണെന്ന് പോലീസ് ഉറപ്പിച്ചു.

 സിഐ സാർ സ്ഥലം പരിശോധിച്ചു.

 എല്ലാവരുടെയും നോട്ടം സ്വാഭാവികമായും അരവിന്ദിലേക്ക് തിരിഞ്ഞു.

"അരവിന്ദ്, നീയും ആര്യ ടീച്ചറും തമ്മിൽ പലതവണ വാക്കുതർക്കമുണ്ടായിട്ടുണ്ടെന്ന് കേൾക്കുന്നുണ്ടല്ലോ?" സിഐ സാർ ചോദിച്ചു.

അരവിന്ദ് വിയർത്തുകൊണ്ട് തലകുനിച്ചു. 

"ഉണ്ട് സാർ, പക്ഷെ അത് വെറും നിസ്സാര കാര്യങ്ങളാണ്..."

"അല്ല അരവിന്ദ്, ആ നിസ്സാര കാര്യങ്ങൾ എപ്പോഴാണ് പകയായി മാറിയതെന്ന് ഞങ്ങൾക്ക് അറിയണം," 

സിഐ സാർ പറഞ്ഞു "ടീച്ചർ മരിക്കുന്നതിന് അല്പസമയം മുമ്പ് നിങ്ങളെ രണ്ടാളെയും ഗേറ്റിനടുത്ത് വെച്ച് കണ്ടവരുണ്ട്.

 നിങ്ങൾ തമ്മിൽ എന്തോ വലിയ തർക്കമുണ്ടായി."

അരവിന്ദ് പകച്ചുപോയി. 

സാർ ഞാൻ ഒന്നും ചെയ്തിട്ടില്ല.

 പക്ഷെ, അന്ന്  ആര്യ ടീച്ചറും  താനും തമ്മിൽ  ഗേറ്റിന് അടുത്ത്  വെച്ച് വഴക്ക് ഉണ്ടാക്കുന്നത് പല ടീച്ചർ മാരും കണ്ടിരുന്നു.. 

 ആര്യയോടുള്ള അയാളുടെ വെറുപ്പ് എല്ലാവർക്കും അറിയാമായിരുന്നു.

 പോലീസ് അരവിന്ദിനെ ജീപ്പിലേക്ക് തള്ളിക്കയറ്റി. 

കാമ്പസ് നിശബ്ദതയിലാണ്ടു.

 അരവിന്ദിനെ അറസ്റ്റ് ചെയ്തുകൊണ്ട് പോലീസ് വാഹനം ഗേറ്റ് കടന്നു